Gepiekelde Kerrievis

Maak 1 kg stokvis goed skoon en sny dit in geskikte stukke reg om te bedien.

Rol die visstukke in koekmeel en braai in baie warm olie of vet totdat dit gaar en goudbruin is.

Geur met sout en peper.

Terwyl die vis bak, sit 3 koppies asyn in 'n pot en verhit.

Voeg 1 groot fyngesnyde ui, 2 lourierblare en 1 teelepel peperkorrels by en kook stadig totdat die ui sag is.

Meng 1 eetlepel meelblom en 1 eetlepel kerriepoeier met 'n bietjie asyn en voeg dit by die uie-mengsel.

Kook vir 'n paar minute.

Pak die warm vis in 'n erde- of glaskom en gooi die warm kerriesous daaroor.

Laat staan om af te koel. Maak toe en sit in die koelkas. Bedien koud.