Troukoek Willem & Riamie (Vrugteblokkies)

Hierdie enkel resep lewer 10 dosyn (±120) balletjies van 20 g elk. Berei die vrugte voor: kap die kersies, neute en dadels.

Rol die Marie beskuitjies met 'n koekroller in 'n metaal skinkbord tot krummels — nie te fyn nie, want dan is die koekies te solied en hard. Moenie in 'n Kenwood maal nie.

Meng al die vrugte saam in 'n bak.

Smelt saam in 'n groot swaarboom ysterpot ('Cookware') op stoofplaat 3 (medium): kondensmelk, suiker, margerien en vanilla. Roer aanhoudend met 'n houtlepel — die mengsel brand maklik vas.

Voeg eers die vrugtemengsel by en meng goed, voeg dan die Marie beskuitjiekrummels by en meng deur.

Vorm die balletjies: skep net genoeg mengsel uit om op een slag te hanteer; laat die res warm in die pot bly. Gebruik 'n elektroniese skaal en weeg elke balletjie op 20 gram. Werk vinnig vóór die mengsel te koud word. Twee persone werk goed — een weeg en een vorm.

Rol elke balletjie effens in versiersuiker (dit verhoed dat dit aan die hande kleef en help dat die wit sjokolade beter dek). As die mengsel te koud word, verhit dit vir 20 sekondes op High in die mikrogolf.

Doop die balletjies in sjokolade: gebruik 'n diep glasbak. Breek die wit en bruin sjokolade apart in blokkies. Mikrogolf een bak op 'n slag vir 2 minute op medium (50% krag), herhaal 2–3 keer en roer na elke 2 minute. Moenie 'n deksel gebruik nie, anders vorm water.

Berei twee metaal skinkborde met waspapier voor. Dompel drie balletjies op 'n slag in die warm sjokolade. Steek 'n tandestokkie in elke balletjie om dit uit die sjokolade te verwyder. Hou dit 'n paar sekondes oor die bak om af te drup, en plaas dan op die waspapier — moenie die balletjies aan mekaar laat raak nie.

Vóór die sjokolade stol, plant die tandestokkies in 'n stuk polistireen om die balletjies regop te laat afkoel. Verhit die sjokolade weer op vir 1 minuut op Medium wanneer dit begin stol (nooit op 100% krag nie).

Wanneer die sjokolade gestol het, verwyder die tandestokkies versigtig met 'n draaibeweging. Beskadigde koekies kan weer in sjokolade gedoop word.