Wildspastei

Marineer 5 kg wildsbenevleis oornag in 'n marinade van blatjang, sojasous, suurlemoensap, heuning, suurlemoenskil, koljander, naeltjies en swartpeper.

Braai 3 uie en 5 gekapte knoffelhuisies liggies in olie. Skep uit en hou eenkant.

Stroop die meeste van die marinade van die vleis af en braai vinnig aan beide kante in dieselfde olie.

Braai klein hoeveelhede vleis op 'n slag sodat dit nie waterig word nie.

Pak die vleis in 'n swaarboom oondskottel ('n ysterpot werk goed) afwisselend met die uie en knoffel.

Meng ½ bottel rooiwyn met 400 ml beesvleisaftreksel en 1 koppie van die marinademengsel en giet oor die vleis.

Voeg sout na smaak by.

Onthou die sojasous is effe sout.

Bedek die oondskottel.

Stowe die vleis tot dit van die bene afval (ongeveer 3–4 ure).

Vul die vloeistof elke uur aan indien nodig.

Skil en kook intussen die geelwortels en aartappels tot amper sag.

Verwyder die vleis van die bene af.

Verwyder ook enige onooglike senings en velletjies.

Sny die vleis op in eweredige stukkies en plaas terug in die pot met sous.

Voeg die wortels en aartappels by die vleis en roer goed deur. Stowe verder vir 20–30 minute.

Skep die vleis in twee pasteibakke en laat afkoel. (Op hierdie stadium kan die bakke gevries word vir latere gebruik.)

Bedek die vleis met pasteideeg van jou keuse. Gekoopte blaardeeg of broskorsdeeg werk goed.

Bak vir 20–30 minute in 'n warm oond van 200 °C.